денеска е:

Jeru the Damaja во МКЦ (16.10.2005)

Младинскиот културен центар има многу значајно место во мојот живот. Бев седмо или осмо одделение (не ми текнува точно) кога отидов на мојот прв концерт во МКЦ. Свиреше еден од најдобрите бендови во поранешната ни држава - Elektricni orgazam. Zlatni papagaj, tata placa sve racune! После тоа следеа Psihomodo pop, па Zabranjeno pusenje и Rambo Amadeus и што уште не. Во 1998 од МКЦ тргна и денес најголемиот македонски музички фестивал - Таксират. Но за жал... со промена на раководната структура на гореспоменатата институција некако како да секнаа и концертите во МКЦ.

И затоа ептен ми се напраи мерак кога прочитав дека Литиумци одлучија да организираат концерт во овој скопски култен простор. Па така, во неделата (16.10.) на гости ни дојде американскиот хип-хоп артист, Jeru the Damaja. Рап баш и не слушам. Единствено Edo Maajka, TBF и Frenki од просторите на екс Југославија и скоро се од македонските артисти (да дадеме support на сцената!). Затоа сметам дека не сум компетентен да кажам дали концертот беше добар или лош, ама можам комплетно да ја пренесам атмосферата во публиката која беше фантастична. Вечерта ја отворија баш тие.. еден куп момци кои ја бранеа честа на македонската сцена. Да Џака Накот, РНС, Мал Голем Човек, Урбана Димензија, Видо, DJ Струја, DJ Панчо...

И се претставија во вистинско светло. Значи нема сомнеж дека фалат луѓе кои што сакаат да прават квалитетна музика.. фалат концерти и концертни простори. Jeru се појави на сцената некаде пред 22 часот. Салата во МКЦ беше преполна.. сите рипаат и креваат раце во вис. Среќни се. Веќе нема сомнеж дали концертот е добар. Одличен е! Ме изненади тоа што сите (или многу голем дел) во публиката ги знаеа песните од Jeru и ги пееа со него. Очигледно момакот е голема фаца. Профи си го одработи настапот и после тоа уште најмалку пола саат даваше автограми на своите фанови.

И за крај да ги цитираме Литиумци: Дај Боже, после сето ова и надлежните од споменатата институција (МКЦ) конечно да сфатат дека ваквите концерти и тоа минимум во неделна доза се она што може да го стави МКЦ на здрави нозе, да му го врати одамна изгубениот сјај и угледот и да ги исели "домаќинките" од сопствениот двор. Поздрав, Филип